2. april 2002

UPA 2002/24

 

Nalinginnaasumik nassuiaatit

Kulturikkut ingerlatsineq sunngiffimmilu sammisassaqartitsineq pillugit Inatsisartut peqqussutissaattut siunnersuut manna sunngiffimmi sammisassaqartitsineq pillugu inatsisartut peqqussutaannik nr. 5, 9. april 1992-imeersumik maannamut atuuttumik iluarsartuusseqqinnermik imaqarpoq.

Tamatuma saniatigut siunnersuutikkut siunertarineqarpoq sunngiffimmi sammisassaqartitsineq pillugu malittarisassat atuisunut atoruminarnerulernissaat, nutarterneqarnissaat pisariillisarnissaallu ilanngullugit.

Kommunini Iluarsartuusseqqinnissamut Ataatsimiititaliarsuup kulturikkut ingerlatsineq sun-ngiffimmilu sammisassaqartitsineq pillugit kaammattuutai pillugit suleqatigiissitap kaammattuutaasa 1998-ip aallartinnerani saqqummiunneqartut malitsigisaannik siunnersuut suliarineqarpoq. Taamaasilluni tunngaviusumik siunertarineqarpoq qulakkeerneqassasoq, kulturimut tunngasut ileqquusutut sunngiffimmi sammisanut naligiissumik inissisimalernissaat.

Aqutsinermut tunngatillugu aalajangersakkat sunngiffimmi sammisassaqartitsinermik ingerlataqarneq pillugu peqqussutip kiisalu kulturimut atuartitsinermullu tunngasut siulersorneqarnerat pillugu Inatsisartut peqqussutaata nr. 8-p, 7. maj 1988-imeersup allanngortinnginnerini allassimasuni takuneqarsinnaapput, taakkunani meeqqat atuarfiannut tunngasut 1997-imi atorunnaarsinneqarlutik. Tamanna tunuliaqutaralugu siunnersuutigineqarpoq malittarisassat aqutsinermut attuumassuteqartut tamarmik kulturikkut sunngiffimmilu sammisassaqartitsinermik ingerlataqarneq pillugu peqqussummut ilaatinneqalissasut, soorlu aamma aqutsineq pillugu peqqussutip atorunnaarsinneqarnissaa siunnersuutigineqartoq.

Sunngiffimmi sammisassaqartitsinermut ataatsimiititaliat massakkut atuuttut atorunnaarsinneqarnissaat siunnersuutigineqarpoq. Sunngiffimmi sammisassaqartitsinermut ataatsimiititaliat pilersinneqarput kommunini kulturimut atuartitsinermullu ataatsimiititalianut ikiuutaasussatut, aqutsineq pillugu peqqussut tunuliaqutaralugu, ataatsimiititalianilu ilaasortat kommunalbestyrelsimit soqutigisaqaqatigiinnillu toqqarneqartarput. Atorunnaarsitsiniarnermut pissutaasutut taaneqarsinnaavoq sunngiffimmi sammisassaqartitsinermut ataatsimiititaliat naammaginanngitsumik ingerlasimanerat, toqqaannartumik aalajangiisinnaassuseqannginnertik kiisalu atuisunik attuumassuteqartunik tamanik sinniisutut atuunissap ajornartorsiutaanera pissutigalugu. Tamatuma saniatigut immikkut ittumik inatsiliornernerni aqutsinermut malittarisassanik aalajangersaasoqassannginneranik, taamaallaalli kommunalbestyrelsit nunaqarfinnilu aqutsisut il.il. pillugit Inatsisartut inatsisaanni taamaattoqarnissaanik, Kommunini Iluarsartuusseqqinnissamut Ataatsimiititaliarsuup kaammattuuta malinneqarpoq. Kisiannili kulturikkut sunngiffimmilu sammisassaqartitsineq pillugu kommunip ingerlatsineranik ikiuutaasussanik kommunalbestyrelsip kommunini ataasiakkaani najukkami assigiinngitsunik immikkut suliassaqartitaasunik ataatsimiittartoqatigiiliornissaa, ataatsimiititaliornissaa, siulersuisoqartitsinissaaluunniit tamatumani mattunneqanngilaq.

Aammattaaq siunnersuummi nutaatut aalajangersarneqarpoq naalakkersuisut tapiissutaat inuussutissarsiutigalugu ingerlataanerusunut tunniunneqassasut. Tamanna kultureqarnikkut pissutsini tamarmiusuni allannguutit kinguneraat, tamatumani paasineqarsimammat ataatsimut isigalugu inuussutissarsiutigalugu ingerlatat annertusisimasut. Aalajangersagaq aqqutigalugu naalakkersuisut tapiissutaata nuna tamakkerlugu aammalu inuussutissarsiutigalugu ingerlatanut sammitinneqarnissaa siunertaavoq, tamanna aamma ilinniarsimanngikkaluarluni aammalu nammineq piumassuseq malillugu ingerlataqarnerit tipsimit aningaasaliissutit aqqutigalugit tapiiffigineqarnissaminnut periarfissaasa annertusisimanerata kinguneraa.

Aammattaaq siunnersuummi nutaatut aalajangersarneqarpoq naalakkersuisut tapiissutaat inuussutissarsiutigalugu ingerlatanut tunniunneqassasut. Tamanna kultureqarnikkut pissutsini tamarmiusuni allannguutit kinguneraat, tamatumani paasineqarsimammat ataatsimut isigalugu inuussutissarsiutigalugu ingerlatat annertusisimasut. Aalajangersagaq aqqutigalugu naalakkersuisut tapiissutaata nuna tamakkerlugu aammalu inuussutissarsiutigalugu ingerlatanut sammitinneqarnissaa siunertaavoq, tamanna aamma ilinniarsimanngikkaluarluni aammalu nammineq piumassuseq malillugu ingerlataqarnerit tipsimit aningaasaliissutit aqqutigalugit tapiiffigineqarnissaminnut periarfissaasa annertusisimanerata kinguneraa.

Aammattaaq siunnersuummi nutaatut aalajangersarneqarpoq, piukkunnartunut timersullammannullu Team Greenlandimut ataatsimoortumik aningaasaliissuteqarnikkut naalakkersuisut aamma tapiissuteqarsinnaasut. Tamanna timersullammannut piumasaqaatit ullumikkut annertunerusumik piumasaqarfigineqalernerisa kinguneraa. Maannakkut periuutsit atuuttut ataatsimoortinnerat pineqarpoq. Aalajangersagaq timersornermi kattuffiit aammalu Timersornermut Siunnersuisoqatigiit tamanna pillugu inassuteqaataat tunngavigalugu siunnersuummut ilanngunneqarpoq.

Aammattaaq kommunalbestyrelsit aalajangigaasa ilaannik naalakkersuisunut naammagittaal-liuutiginnissinnaaneq peerneqarpoq. Allannguinermut pissutaavoq Inatsisartut Ombudsmandiata atuutsilernerata kingorna taanna innuttaasunut kommunit sulianik ingerlatsinerat pillugu naammagittaalliluuteqarusuttunut nalinginnaasumik naammagittaalliorfigissallugu aqqutissaalermat. Manna tikillugu kommunalbestyrelsip aalajangigai pillugit naammagittaalliuutit ikittuinnaasimapput, taamaattumik allannguut allaffissornikkut annertunerusumik sunniuteqassanngilaq.

Kiisalu ilisimatitsissutigineqassaaq kommunip suliassatut pilersaarutai naalakkersuisunut nassiunneqartarunnaarmata. Allannguut taanna ilanngunneqarpoq kommunip aqutsinera pillugu malittarisassanut atuuttunut pitsaanerusumik naapertuutsitsilernissaq pillugu. Tamatumunnga peqatigitillugu siunnersuummiippoq aalajangersagaq naalakkersuisut peqqussut malillugu isumagisassaminnut paasissutissat pisariaqarsorisatik kommunalbestyrelsinit piumasinnaagaat. Allannguut allaffissornikkut annertunerusumik sunniuteqassanngilaq.

Atuutilersinnera.

Siunnersuutigineqarpoq peqqussut 1. juli 2002-miit atuutilissasoq.

Aningaasatigut allaffissornikkullu kingunerisassai.

Sunngiffimmi sammisassaqartitsinermut ataatsimiititaliat atorunnaarsinneqarnerat kommunit allaffissornikkut annikinnerusumik suliaqalernerannik kinguneqarpoq. Tamanna eqqaassanngikkaanni siunnersuut Namminersornerullutik Oqartussanut kommuninulluunniit aningaasaqarnikkut allaffissornikkullu kinguneqassanngilaq.

Tusarniaaneq.

Inatsisartut peqqussutissaattut siunnersuummut missingiut manna ukununnga tusarniaassutigineqareerpoq KANUKOKA, IMAK, Aningaasaqarnermut Pisortaqarfik, Naalakkersuisut Allattoqarfiat (Nunami namminermi pissutsinut Allaffik), Timersorneq pillugu Siunnersuisoqatigiit, Kultur pillugu Siunnersuisoqatigiit, STTK, Sukorseq, Kalaallit Nunaanni Spejderit, Kalaallit Nunaanni Timersoqatigiit Kattuffiat, Sorlak, Kalaallit Røde Korsiat, Utoqqaat Nipaat, Kalaallit Nunaanni Katersortarfiit Kattuffiat, KIMIK, Kalaallit Nunaanni Qimussersartut Kattuffiat, Arnat Peqatigiit, Kalaallit Nunaanni Peqatigiinniat Kattuffiat, Kalaaleq, Kalaallit Nunaanni Erinarsoqatigiit Kattuffiat aamma Kalaallit Atuakkiortut.

KANUKOKA tusarniaanermut akissummini allappoq kommuninit ataasiakkaanit tusarniaanermut akissutit amerlanerpaartaanni aqutsinermut tunngatillugu aalajangersakkat ajornartorsiutaanerat immikkut sammineqarsimasoq. Oqaatigineqarpoq kommunit assut ajuusaarutigigaat kultureqarnermut sunngiffimmullu siulersuisunik pilersitsinikkut tamakkununnga tunngasut nukittorsarneqarnissaannik siusinnerusukkut eqqarsaatigineqarsimagaluartoq peqqussutissatut siunnersuummit peerneqarsimammat. Tassunga uiggiullugu kattuffimmit nalunaarutigineqarpoq aqutsinermut tunngatillugu aalajangersakkat peqqussutissatut siunnersuummi 2001-imi januaarimi tusarniaassutigalugu nassiunneqartumiittut assigalugit kultureqarnermut sunngiffimmullu siulersuisut pilersinneqarnissaannik peqqussummi aalajangersakkanik ilanngussisoqarnissaanik piumasaqaateqarsimanertik aalajangiusimagitsik. Kattuffiuttaaq oqaatigaa Namminersornerullutik Oqartussat kultureqarnermut sunngiffimmullu siulersuisunik atuutilersitsinerup kommunimi naalakkersuinermik pisortatullu ingerlatsinermik aalajangersaasarnissamut kommunit kiffaanngissuseqarnerata killilerneqarnissaanik tunngavilersuutaat tunngavissaqartinngittuarsinnaritsik, tassa siunnersuutigineqartutut siulersuisunngortussat sunngiffimmut ataatsimiititaliaq peqqussutikkut aalajangersagaareersoq taarserpassuk.

Kiisalu KANUKOKA-p oqaatigaa aqutsinermut aalajangersakkat eqqaassanngikkaanni kommunit pingaarnerusutigut peqqussutissatut siunnersuut naammagisimaarlugu oqaatigisimagaat.

Naalakkersuisut kommunini iluarsaaqqinnissamut ataatsimiititaliarsuup immikkut inatsisiliorluni aqutsinermut maleruagassanik aalajangersaasoqannginnissaanik kaammattuutaa innersuussutigalugu KANUKOKA-p kultureqarnermut sunngiffimmullu siulersuisunik pilersitsisoqarnissaanik aalajangersakkanik ilanngussisoqarnissaanik kissaateqarnera akuerissallugu periarfissaqarsimanngillat.

Kommunit oqaaseqaatigisimasaat allat siunnersuummi allanngortitsinissamut pissutissaasimanngillattaaq kisiannili nassuiaatinik ataasiakkaanik erseqqissaanissamut pissutissaasimallutik.

IMAK-ip tusarniaanermut akissummini siunnersuutigaa meeqqanut sunngiffimmi neqerooruteqartoqarnissaa qulakkeerlugu ilanngussisoqassasoq tamakkulu pitsaanerulernissaat/annertusi-neqarnissaat kissaatigineqartoq. Naalakkersuisut isumaqarput siunnersuummi taamatut qulakkeerinnittoqareersoq, taamaammallu siunnersuummut nassuiaatini tamakku taamaallaat erseqqissarneqarlutik.

Taamatuttaaq IMAK-ip ingerlaqqilluni oqaatigisimavaa siunnersuummi allaaserineqarsiman-ngitsoq nunaqarfinni sunngiffimmi sammisassaqartitsinermut pisortanut sunngiffimmi sammisassaqartitsinermut ataatsimiititaliat atorunnaarsinneqarnerat sunik kinguneqassasoq naatsorsuutigineqarnersoq, aamma sunngiffimmi sammisassaqartitsinermut ataatsimiititaliat atorunnaarsinneqarnerat sunngiffimmi sammisassaqartitsinermut pisortat pisinnaatitaaffiisa akisussaaffiisalu assut annertuseriarnerannik kinguneqartussatut naatsorsuutigisariaqartoq, tassami najukkani ataatsimiititaliaarutissammat najukkami sunngiffimmi inuuneq pillugu aalajangiisinnaasunik. Taamaalisoqarsinnaanera Naalakkersuisut isumaqatiginngilaat tassami najukkani sunngiffimmut ataatsimiititaliat aalajangiisinnaassuseqartitaasimanngimmata. Taamaammat Naalakkersuisut isumaqarput siunnersuut sunngiffimmi sammisassaqartitsinermut pisortat pisinnaatitaaffiisa allanngornerinik kinguneqassanngitsoq.

Kalaallit Nunaanni Timersoqatigiit Kattuffiat tusarniaanermut akissummini kaammattuivoq siunnersuutip §-iisa 25-anni ilanngunneqassasoq "Kalaallit Nunaanni Timersoqatigiit Kattuffiannut", tassungalu tunngavilersuutitut allassimallugu, taamaaliorneq siunnersuutip §-iisa 26-annut naapertuutilersitsissasoq, tassanimi aalajangersarneqarmat timersortartunut piukkunnartunut timersullammannullu Team Greenlandimut ataatsimut aningaasaliinikkut tapiissuteqartoqartarsinnaasoq. Naalakkersuisut kaammattutip malinneqarnissaa pissutissaqartissimanngilaat, tassami siunnersuummi oqaasertaliunneqartutigut timersoqatigiit nuna tamakkerlugu kattuffiinut ataatsimut arlalinnulluunniit tapiissuteqartoqartarsinnaanissaa kissaatigineqarmat. Tamanna aalajangersakkamut nassuiaatini erseqqissarneqarpoq, siunnersuutillu inatsisilerituut oqaaseqaataasa ilanngunneqareernerisigut § 24-ngorpoq.

Kultur pillugu Siunnersuisoqatigiit tusarniaanermut akissumminni allapput siunnersuutip §-iisa siullianni erinarsoqatigiit inissinneqarnissaat amigaatigineqartoq, taamatummi ingerlatsineq kalaallit kulturiannut ilaalluinnarmat. Naalakkersuisut taamatut kissaateqarnerup akuersaarnissaanut pissutissaqarsimanngillat, taamaaliortoqassappammi erinarsoqatigiinnik salliutitsisoqalissammat tamannalu kissaatigineqanngilaq. Taarsiullugu erinarsoqatigeeqarneq Kultur pillugu Siunnersuisoqatigiit kaammattuuteqarneratigut siunnersuummi §§ 30-mut aamma 31-mut ilanngunneqarput, taakkunanilu Kultur pillugu Siunnersuisoqatigiit allannguutissanik annikinnerusunik siunnersuutaat allat aammattaaq ilanngunneqarput. Kultur pillugu Siunnersuisoqatigiit oqaaseqaataat allat siunnersuummut nassuiaatini ilanngussuunneqarput.

Tusarniaavigineqartut allat tusarniaanermut akissutaat immikkut oqaaseqarfigissallugit pissutissaqanngilaq, aammattaaq siunnersuummi allanngortitsinissanut pissutissaasimanatik.

 

Siunnersuutip aalajangersagartaanut ataasiakkaanut nassuiaatit.

 

§ 1-imut

Aalajangersakkami tulleriiaarlugit taagorneqarput kulturikkut ingerlatsineq sunngiffimmilu sammisassaqartitsineq qanoq paasisariaqarnersut. Maannamut sunngiffimmi sammisassaqartitsineq pillugu peqqussutaasimasumut naleqqiullugu nutaartaasoq tassaavoq najukkami katersugaasiveqarnermut tunngatillugu nr. 6-itut aammalu tamanut ammasumik atuakkanik atorniartarfeqarnermut tunngatillugu nr. 7-itut ilanngussaq, taakkualu tamarmik marluullutik kulturimut atuartitsinermullu tunngasut siulersorneqarnerat pillugu Inatsisartut peqqussutaat nr. 8, 7. maj 1988-imeersoq naapertorlugu malittarisassaqartitaagaluarput.

§ 2-mut

imm. 1-imut

Kulturikkut ingerlatsinermi sunngiffimmilu sammisassaqartitsinermi anguniakkat tunngavissallu kommunalbestyrelsip aalajangersassavai.

imm. 2-mut

Sunngiffimmi sammisassaqartitsineq pillugu peqqussutaasumut maannamut atuuttumut naleqqiullugu nutaartaasoq tassaavoq, ukiumut sammisassat pillugit pilersaarut Kultureqarnermut Pisortaqarfimmut nassiunneqassanngimmat, tamanna siunnersuut naapertorlugu nalinginnaasumik kommunit aalajangiinerisa Naalakkersuisunut naammagittaalliuutigineqarsinnaajunnaarnerinut atatillugu isigineqassaaq.

imm. 3-mut

Inunnik sulisussaqarnissaq kommunalbestyrelsip akisussaaffigaa.

§ 3-mut

imm. 1-imut

Aalajangersagaq meeqqat atuarfiat pillugu Inatsisartut peqqussutaat nr. 1-imi, 6. juni 1997-imeersumi § 42, imm. 1-imut naapertuuppoq.

imm. 2-mut

Aalajangersagaq meeqqat atuarfiat pillugu peqqussummi qulaani taaneqartumi § 42, imm. 2-mut naapertuuppoq. Suliassanik tigusinissaq pillugu Naalakkersuisut aamma kommunip ataatsip arlaqartulluunniit akornanni isumaqatigiissuteqarnermi erseqqissaatigineqassaaq suliassat suut tiguneqassanersut. Tamatuma saniatigut najukkani kommunit aggornerisa avataanniittut nunaqqatigiit siunnersuisoqatigiivi pillugit inatsisartut peqqussutaat nr. 13, 20. oktober 1988-imeersumi malittarisassat naapertorlugut Naalakkersuisut suliassanik najukkani nunaqqatigiit siunnersuisoqatigiivinut tunniussisinnaapput.

§ 4-mut

imm. 1-imut

Inersimasut sunngiffimmi atuartinneqarneranni sammineqarsinnaasut killilerneqarnerat pillugu kaajallaasitaq nr. 23, 26. juni 1980-imeersoq takuuk.

imm. 2-mut

Ukioqatigiinngitsut ataatsimoortissinnaanerinut periarfissaqarnikkut siunertarineqarpoq aaqqissuussinerup sapinngisamik ammasuunissaa. Aappaatigulli sammineqartup sunaanera apeqqutaatillugu aalajangersimasunik ukioqatigiiaanut sunngiffimmi atuartitsinissamut periarfissaqassaaq taamatuttaaq meeraannarnut inersimasuinnarnulluunniit.

imm. 3-mut

Peqataasut ukiui eqqarsaatigalugit tamanut tunngasumik ilinniartinneqarnermut, nipilersornermik ilinniartinneqarnermut kiisalu ulluinnarni atortariaqakkanik ilinniartinneqarnermut peqataanissami piumasaqaateqartoqanngilaq.

Tamatuma saniatigut inersimasunut højskolinut, ilinniagaqarniaqatigiinnut, oqalugiarnernut kiisalu inuussutissarsiutitigut pikkorissarnernut atatillugu aallaavittut qassinik ukioqassutsikkut killiliisoqanngilaq, taamaattorli pilersaarusiornermi/aaqqissuinermi sammisap eqqarsaatigineratigut taamatut killiliinissaq periarfissaqassalluni. Qassinik ukioqarnikkut killiliisinnaaneq kommunini pisortanit oqartussaasunit, ilinniartitsisoq ilitsersuisorluunniit suleqatigalugit aalajangiivigineqartassaaq, pikkorissarnerillu neqeroorutiginerini piumasaqaatit allat pisariaqartut, soorlu peqataasut immikkoortunik siuliinik ingerlatsereersimanissaat il.il., ilagalugit ersersinneqassalluni.

imm. 4-mut

Ataatsimoorussamik aaqqissuussinernut assersuutitut tammaarsimaaqatigiinnerit, oqalugiarnerit nuannersumillu ataatsimooqatigiinnerit taaneqarsinnaapput.

imm. 5-imut

Sunngiffimmi atuartitsineq piffissanut aalajangersimasunut, soorlu sapaatit akunnerisa naanerini nalinginnaasumik piffissap suliffiusup avataanut assigisaanulluunniit innersuunneqanngilaq.

§ 5-imut

imm. 1-2-mut

Sunngiffimmi atuartitsinerup kommunalbestyrelsimit akuerineqarnissaanut piumasaqaatit tulleriiaarlugit allattorneqarput. Piumasaqaatit naammassineqarsimappata akuersissuteqartoqassaaq.

imm. 3-mut

Peqataasut ikinnerpaaffittut amerlassusaat pillugu immikkut akuersissuteqarneq taamaallaat ikilisitsilluni pisinnaavoq, taamaasilluni peqataasut ikinnerpaaffissaat annikillisinneqarsinnaalluni, akerlianik ikinnerpaaffissaat annertusineqarsinnaanngilaq.

§ 6-imut

imm. 1-2-mut

Nalinginnaasumik atuartitsineq nassuiarneqarpoq. § 6 § 8-mut aamma § 14-imut nallersuunneqassaaq, tamatumalu kingunerisaanik sammisat assigiit iluini annertusisamik imaluunniit assassorissanik mernguernartunillu ilinniartitsineq neqeroorutigineqarsinnaassalluni.

imm. 3-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

imm. 4-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

Ilinniartitsineq taamaatiinnarneqarpat, peqataasut agguaqatigiissillugu amerlassusiisa naatsorsorneqarnerinut taanna ilaatinneqassanngilaq.

§ 7-imut

imm. 1-2-mut

Nipilersornermik ilinniartitsineq nassuiarneqarpoq.

imm. 3-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

imm. 4-5-imut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

Ilinniartitsineq taamaatiinnarneqarpat, peqataasut agguaqatigiissillugu amerlassusiisa naatsorsorneqarnerinut taanna ilaatinneqassanngilaq.

§ 8-mut

imm. 1-2-mut

Inersimasunut højskole nassuiarneqarpoq. Isumaliutigineqarsimavoq aalajangersagaq peerneqartariaqarnersoq. Inersimasunut højskolitut iluseq ullumikkut taamaallaat immikkoortukkuutaaraluni aaqqissuussamik kalaallisut ilinniartitsinermut atorneqartarpoq. Taamaattorli misilitsinnissamut piareersaataasumik atuartitsineq pineqanngikkaluartoq, taamatut ilusilimmik sun-ngiffimmi atuartitsinermik periarfissaqarnissamut suli pisariaqartitsisoqarpoq. § 8 § 6-mut aamma § 14-imut nallersuunneqassaaq, tamatumalu kingunerisaanik sammisat assigiit iluini tamanut tunngasunik imaluunniit ulluinnarni atortariaqakkanik aamma mernguernartunik ilinniartitsineq neqeroorutigineqarsinnaassalluni.

Taamatut aalajangersaanikkut assersuutigalugu atuakkiortut ilinniarfiannik, atuakkialerinermi sammisat pillugit inersimasunik højskolimik aamma assilialiorlutik qalipaasartunut pikkorissartitsinernik pilersitsisoqarsinnaasassaaq.

imm. 3-mut

Sunngiffimmi sammisassaqartitsinermik ingerlataqarneq pillugu peqqussutaasumut maannamut atuuttumut naleqqiullugu nutaartaasoq tassaavoq, atuartitsineq aallaavittut kikkunnut tamanut ammasuussammat, inunnullu 19-it sinnerlugit ukiulinnut taamaallaat tunngatinneqarnani, tamanna meeqqat atuarfianni sunngiffimmi atuartitsinerup siunnersuummut matumunnga ilanngunneqarnerata kinguneraa.

Pikkorissarnernut tunngavissaqartumik ukioqqortussutsikkut killiliiffigineqarsinnaasunut assersuutitut taaneqarsinnaapput pikkorissarnerit atuagarsornermut sammisut, soorlu atuakkialerineq aamma isumaanik itisuunik ilisimatusarneq, inerisimassusermik ilaatigut piumasaqaateqarfiusut.

imm. 4-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

imm. 5-imut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3. Ilinniartitsineq taamaatiinnarneqarpat, peqataasut agguaqatigiissillugu amerlassusaasa naatsorsorneqarnerinut taanna ilaatinneqassanngilaq.

§ 9-mut

imm. 1-imut

Ilinniagaqarniaqatigiit nassuiarneqarput.

imm. 2-mut

Ilinniagaqarniaqatigiinnut tunngavissaqartumik ukioqqortussutsikkut killiliiffigineqarsinnaasunut assersuutitut taaneqarsinnaapput ilinniagaqarniaqatigiit atuagarsornermut sammisut, soorlu atuakkialerineq aamma isummanik itisuunik ilisimatusarneq, inerisimassusermik ilaatigut piumasaqaateqarfiusut.

imm. 3-mut

Atortut tulluartuunerat aalajangiivigineqassaaq ilaatigut peqataasut pisinnaariigaat sammisallu qanoq ittuunera aallaavigalugit.

imm. 4-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

imm. 5-imut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3. Ilinniartitsineq taamaatiinnarneqarpat, peqataasut agguaqatigiissillugu amerlassusaasa naatsorsorneqarnerinut taanna ilaatinneqassanngilaq.

§ 10-mut

imm. 1-imut

Oqalugiarneq nassuiarneqarpoq.

imm. 2-mut

Oqalugiarnernut tunngavissaqartumik ukioqqortussutsikkut killiliiffigineqarsinnaasunut assersuutitut taaneqarsinnaapput oqalugiarnerit atuagarsornermut sammisut, soorlu atuakkialerineq aamma isummanik itisuunik ilisimatusarneq, inerisimassusermik ilaatigut piumasaqaateqarfiusut.

imm. 3-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3

Oqalugiarnerit ataasiakkaat nalinginnaasumik piffissaq sivisunngitsoq atorlugu pilersaarusiorneqartarmata peqataasussanik ikinnerpaaffiliinissamik piumasaqartoqanngilaq.

imm. 4-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3. Ilinniartitsineq taamaatiinnarneqarpat, peqataasut agguaqatigiissillugu amerlassusaasa naatsorsorneqarnerinut taanna ilaatinneqassanngilaq.

Oqalugiaqattaarnerit amerlassusiat marlunniit arlalippassuarnut nikerarsinnaavoq. Taamaattumik nalinginnaasumik atuartitsinermut, nipilersornermik atuartitsinermut, inersimasut højskolertarnerannut, ilinniaqatigiinnut, inuussutissarsiutinut tunngasunut pikkorissarnernut aammalu ulluinnarni atortariaqakkat pillugit atuartitsinermut atatillugu sapaatip akunneri malittuinnaat sisamat iluanni amerlassusissaasa agguaqatigiissinnerat pillugu aalajangersagaq taakkununnga atuutinngilaq. Taamaattumik agguaqatigiissinnerat pinerit tamaasa naatsorsorneqartassaaq.

§ 11-imut

Kalaallit Nunaanni ilinniarnertuunngorniarfinni ilinniagaqartut pillugit Namminersornerullutik Oqartussat nalunaarutaat nr. 21, 5. august 1992-imeersoq, Namminersornerullutik Oqartussat nalunaarutaatigut nr. 28, 27. juni 1994-imeersukkut allanngortinneqartoq takuuk.

§ 12-imut

imm. 1-imut

Immikkut ittumik atuartitsineq nassuiarneqarpoq. Oqaaseq "innarluuteqarneq" timikkut tarnikkullu innarluuteqarnermut tunngatinneqarpoq. Inuup innarluuteqartutut isigineqarnissaa nalornissutigineqalerpat, soorlu najukkami atuarfimmi tarnip pissusiinik ilisimasaqartup, atuarfiup pisortaata nakorsalluunniit oqaaseqaatai naapertorlugit aalajangiisoqartassaaq.

imm. 2-mut

Sunngiffimmi sammisassaqartitsineq pillugu peqqussutaasumut maannamut atuuttumut naleqqiullugu nutaartaasoq tassaavoq, peqataasut tassaassammata kikkulluunniit atuartuusussatut ukioqalereersimasut, kisiannili maannamutut 19-it sinnerlugit ukioqalereersimasuussanatik, tamanna meeqqat atuarfianni sunngiffimmi atuartitsinerup siunnersuummut matumunga ilan-ngunneqarnerata kinguneraa.

imm. 3-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

imm. 4-mut

Aalajangersakkami siunertarineqarpoq nalinginnaasumik marlunnik peqataasoqarnissaanik piumasaqaat, tak. § 12, imm. 3, piviusunngortinneqarsinnaanngitsoq siumut takuneqarsinnaatillugu.

imm. 5-imut

§ 12 § 6-imut aamma § 8-mut nallersuunneqassaaq, tamatumalu kingunerisaanik tamanut tun-ngasumik aamma ilinniartitaanerit ingerlaqqiffiusut neqeroorutigineqarsinnaassallutik.

imm. 6-imut

Malittarisassat nalunaarutinngorlugit assigisaatigullu aalajangersarneqarsinnaapput.

§ 13-imut

imm. 1-imut

Inuussutissarsiutinut tunngasunut pikkorissarnerit nassuiarneqarput.

Inuussutissarsiutinut tunngasunut pikkorissarnernut assersuutitut siunnersuummi § 8, imm. 1-imut nassuiaatit innersuussutigineqarput.

imm. 2-mut

Sunngiffimmi sammisassaqartitsinermik ingerlataqarneq pillugu peqqussutaasumut maannamut atuuttumut naleqqiullugu nutaartaasoq tassaavoq, aallaavittut ilinniartitsineq kikkunnut tamanut ammasuussammat, maannamutut 19-it sinnerlugit ukioqalereersimasuinnarnut tunngatitaanani, tamanna meeqqat atuarfianni sunngiffimmi atuartitsinerup siunnersuummut matumunga ilanngunneqarnerata kinguneraa.

Pikkorissarnernut tunngavissaqartumik qassinik ukioqassutsimut killiliiffigineqarsinnaasutut assersuutitut taaneqarsinnaapput kivittaatinik ingerlatsinermut uppernarsaatit il.il., tamatumani sulinermi avatangiisit pillugit inatsisinut ilaatinneqartut atortut atorneqartarmata.

imm. 3-mut

Suliffeqarnermi kattuffiit pineqartumut tunngassuteqartut sapinngisamik sulisitsisunut sulinermillu inuussutissarsiuteqartunut sinniisuussapput.

imm. 4-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

imm. 5-imut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3. Ilinniartitsineq taamaatiinnarneqarpat, peqataasut agguaqatigiissillugu amerlassusaasa naatsorsorneqarnerinut taanna ilaatinneqassanngilaq.

§ 14-imut

imm. 1-2-mut

Ulluinnarni atortariaqakkat pillugit ilinniartitsineq nassuiarneqarpoq.

imm. 3-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3.

imm. 4-mut

Taassuma saneqqunneqarnissaanut kommunalbestyrelsi immikkut akuersissuteqarsinnaavoq, tak. § 5, imm. 3. Ilinniartitsineq taamaatiinnarneqarpat, peqataasut agguaqatigiissillugu amerlassusaasa naatsorsorneqarnerinut taanna ilaatinneqassanngilaq.

imm. 5-imut

Malittarisassat nalunaarutinngorlugit assigisaatigullu aalajangersarneqarsinnaapput.

§ 15-imut

Malittarisassat nalunaarutinngorlugit assigisaatigullu aalajangersarneqarsinnaapput.

§ 16-imut

imm. 1-imut

Aalajangersakkakkut kommunalbestyrelsip akiliuteqartitsisinnaanera tunngavilerneqarpoq.

imm. 2-mut

Sunngiffimmi atuartitsinermi peqataanermut akiliuteqarneq pillugu Namminersornerullutik Oqartussat nalunaarutaat nr. 29, 27. juni 1994-imeersoq takuuk.

§ 17-imut

Klubbit sunngiffimmi sukisaarsartarfiit nassuiarneqarput.

§ 18-imut

imm. 1-imut

Kommunini klubbinik sunngiffimmi sukisaarsaartarfinnik pilersitsinissamut piumasaqaatit tulleriiaarlugit taagorneqarput. Taamaasiornikkut siunertarineqarpoq qulakkeerneqassasoq, klubbinik sunngiffimmi sukisaarsaartarfinnik meeqqanut inuusuttunullu tamanut atorluarsinnaasunik neqerooruteqarnissaq. Aalajangersagaq taamaallaat kommunit klubbiinuinnaq tunngavoq.

imm. 2-mut

Malittarisassat nalunaarutinngorlugit assigisaannillu aalajangersarneqarsinnaapput.

§ 19-imut

imm. 1-imut

Aalajangersagaq taamaallaat kommunit klubbiinuinnaq tunngavoq.

imm. 2-mut

Malittarisassat nalunaarutinngorlugit assigisaannillu aalajangersarneqarsinnaapput.

§ 20-imut

imm. 1-imut

Aalajangersagaq taamaallaat klubbinut kommuninit pigineqanngitsunut atuuppoq.

imm. 2-3-mut

Klubbit sunngiffimmi sukisaarsaartarfiit kommuninit pigineqanngitsut akuerineqassagunik piumasaqaatinik sunik naammassinnissimanissaannut kiisalu nakutilliisussaatitaanerup qanoq ingerlanneqarnissaanut kommunalbestyrelsip aalajangiinissaa apeqqutaassaaq, tassa Naalakkersuisut tamatumunnga tunngasunik aalajangersagaliornissaata tungaannut.

imm. 4-mut

Malittarisassat nalunaarutinngorlugit assigisaannilluunniit aalajangersarneqarsinnaapput.

§ 21-imut

Meeqqat inuusuttullu suliniaqatigiiffii nassuiarneqarput.

Sunngiffimmi sammisassaqartitsinermik ingerlataqarneq pillugu peqqussutaasumut maannamut atuuttumut naleqqiullugu qassinik ukioqarnissamik killiliussaq nutaartaavoq, taanna 25-nik ukioqarnissamiit 30-nik ukioqarnissamut qaffanneqarmat tipsimit lottomillu aningaasaliissutinik pissarsinissamut danskit malittarisassaannut naapertuuttunngortitsiniarluni.

§ 22-imut

Nuna tamakkerlugu meeqqat inuusuttullu suliniaqatigiiffiisa allaffissornikkut ingerlanneqarnerinut aamma aningaasartuutinut suliniaqatigiiffiit ulluinnarni sulinerinut attuumassuteqartunut Naalakkersuisut tapiissuteqarsinnaapput. Suliniaqatigiiffiup peqatigiiffiulluunniit ilaa meeqqanut inuusuttunullu sammisassaqartitsippat, meeqqanut inuusuttunullu tunngasortaa naapertorlugu tapiissuteqartoqarsinnaavoq.

§ 23-imut

Najukkani meeqqat inuusuttullu suliniaqatigiiffiisa allaffissornikkut ingerlatsinerinut aammalu aningaasartuutinut suliniaqatigiiffiit ulluinnarni sulinerinut attuumassuteqartunut kommunit tapiissuteqarsinnaapput. Suliniaqatigiiffiup peqatigiiffiulluunniit ilaa meeqqanut inuusuttunullu sammisassaqartitsippat, meeqqanut inuusuttunullu tunngasortaa naapertorlugu tapiissuteqartoqarsinnaavoq.

§ 24-imut

Aalajangersagaq § 26-mut nallersuunneqassaaq taaneqarlunilu nuna tamakkerlugu timersornermut tapiissuteqarnissamut Naalakkersuisut periarfissaqartut. Aalajangersagaq § 25-mut atatillugu isigineqassaaq, tassani pineqarmat piukkunnartunut timersullammannullu tapiissuteqartarneq. Taamaalilluni § 24 malillugu tapiissuteqartarneq timersornernut allanut tamanut tunngatitaavoq, tassalu, timersornernut tamanit peqataaffigineqarsinnaasunut, innarluutillit timersornerinut, meeqqat timersornerinut, utoqqaat timersornerinut il.il.

Naalakkersuisut tapiissutaat kattuffimmut aammalu ataatsimoortumik aningaasaliissutitut tunniunneqassammata, tassa imaappoq killissarititaasut iluanni aningaasaliissutitut, taamaaliortoqarpoq timersuutit assigiinngitsut aammalu timersornikkut ingerlatat assigiinngitsut akornanni tulleriiaarinerup timersortartut namminneq akornanni suliarineqartarnissaa qulakkeerniarlugu.

Aalajangersakkakkut periarfissiisoqarpoq nuna tamakkerlugu kattuffinnut assigiinngitsunut arlalinnut tapiissuteqartoqartarsinnaanissaanut.

§ 25-imut

Sunngiffimmi sammisassaqartitsinermik ingerlataqarneq pillugu peqqussutaasumut maannamut atuuttumut naleqqiullugu nutaartaasoq tassaavoq, Naalakkersuisut maanna piukkunnaatilinnut timersullammannullu tapiissuteqarsinnaalermata, tamannalu ullumikkut timersortartunut piumasaqaatit sakkortunerulernerisa kinguneraat.

Naalakkersuisut tapiissutaat kattuffimmut aammalu ataatsimoortumik aningaasaliissutitut tunniunneqassammata, tassa imaappoq killissarititaasut iluanni aningaasaliissutitut, taamaaliortoqarpoq timersuutit assigiinngitsut aammalu timersornikkut ingerlatat assigiinngitsut akornanni tulleriiaarinerup timersortartut namminneq akornanni suliarineqartarnissaa qulakkeerniarlugu.

§ 26-imut

Aalajangersagaq § 24-mut nallersuunneqassaaq, najukkamilu timersornermut tapiissuteqarnissamut kommunit periarfissaat pineqarlutik.

Ilitsersuisut aningaasarsiaqartinnerata saniatigut angalanernut, ininut atortunullu assigiinngitsunut atatillugu aningaasartuutit matussusernissaannut ilaatigut tapiissuteqartoqarsinnaavoq.

§ 27-imut

Killiliineq eqqarsaatigineqarpoq ima pissasoq nuna tamakkerlugu timersoqatigiiffiit kattuffi kapitali 5 naapertorlugu meeqqanut inuusuttunullu sammisassaqartitsinerit annertussusii tun-ngavigalugit tapiiffigineqarsinnaasut.

§ 28-imut

imm. 1-imut

Timersornermut nipilersornermullu højskolimiinnermut kiisalu højskolini allatigut mernguernartunik sammisanik neqerooruteqarfiusumiinnernut taamaallaat tapersiisoqarsinnaavoq. Høj-skolimiinnernut allanut tapiissuteqartarneq Oqaatsinik Pikkorissarfik aamma folkehøjskolit pillugit inatsisitigut malittarisassaqartitaavoq.

imm. 2-imut

Malittarisassat nalunaarutinngorlugit assigisaannilluunniit aalajangersarneqarsinnaapput.

§ 29-imut

Sunngiffimmi sammisassaqartitsinermik ingerlataqarneq pillugu peqqussutaasumut maannamut atuuttumut naleqqiullugu nutaartaasoq tassaavoq, najukkami katersugaasiveqarnermik ingerlatsinerup ilanngunneqarnera, taanna maannamut kulturimut atuartitsinermullu tunngasut siulersorneqarnerat pillugu Inatsisartut peqqussutaat nr. 8, 7. maj 1988-imeersoq naapertorlugu malittarisassaqarpoq.

Pissutissaqartinneqarsimavortaaq erseqqissassallugu atuagassaqartitsineq taamatuttaaq aviisinik quppersakkanillu suliaqarneq aammattaaq kulturikkut ingerlatsinermut inunnillu qaammarsaanermut ilaatinneqarsinnaammata taamatuttaaq isiginnaartitsineq, erinarsornerit nipilersornerillu eqqarsaatigalugit.

§ 30-imut

imm. 1-imut

Aalajangersakkami tulleriiaarlugit allattorneqarput suut Naalakkersuisut kommunalbestyrelsillu tapersiiffigisinnaaneraat. Sunngiffimmi sammisassaqartitsineq pillugu peqqussutaasumut maannamut atuuttumut naleqqiullugu nutaartaasoq tassaavoq, najukkami katersugaasiveqarnermik ingerlatsinerup nr. 8-mi ilanngunneqarnera, taanna maannamut kulturimut atuartitsinermullu tunngasut siulersorneqarnerat pillugu Inatsisartut peqqussutaat nr. 8, 7. maj 1988-imeersoq naapertorlugu malittarisassaqartitaagaluarpoq.

Tapersiisarnermik oqarnermi tapersiissutit suugaluartulluunniit taamatuttaaq tapiissutit eqqarsaatigineqarput.

imm. 2-mut

Nutaartaavortaaq Naalakkersuisut tapiissutaat aammattaaq pingaartumik inuussutissarsiutigalugu ingerlatanut tapiissutigineqarsinnaalermata, tamannalu inuussutissarsiornermut saakkiartuinnarnerup kinguneraa.

imm. 3-mut

Sammisat, eqqumiitsuliortut il.il. ataasiakkaat tapiissutinik allatigulluunniit tapersiissutinik pissarsitinneqartut piviusumik tunngaveqarnissamik tamatigoortuunissamillu piumasaqaatinik malinninnissaannik aalajangersagaq isumaqanngilaq. Akerlianilli ataatsimoortumik kulturikkut ingerlatsilluni inunnillu qaammarsaalluni neqeroorutit tamatigoortuunissaat pisortat oqartussaasut tapersiissuteqartut qulakkeerniassavaat. Tamanna isumaqarpoq, kulturikkut ingerlatsilluni inunnillu qaammarsaalluni sulinerup iluani piviusumik tunngaveqarnissamik tamatigoortuunissamillu piumasaqaatit nalilerneqarnerat pineqartup iluani sammisat tamakkiisut tunuliaqutaralugit pisassasoq. Tamatuma saniatigut tamatigoortuunissamik piumasaqaatit isumaqarput, innuttaasuni pisariaqartitsisoqarpat ilinniakkanut assigiinngitsunut sammisut tamarmik, pineqartut assigiinngitsut tamarmik sammisallu assigiinngitsut tamarmik iluaquserneqassasut. Naleqquttumik pisariaqartitsineq ilaatigut nalilerneqarsinnaavoq innuttaasut amerlassusaat, maannamullu sammisaqartitsisimanerup annertussusaa tunngavigalugit. Innuttaasut sapinngisamik assigiinngiiaartunik neqerooruteqarfiginissaat kommunit anguniassavaat.

Suliaarineqartup qaammarsaanermut eqqumiitsuliornermulluunniit tunngasuunissaanik piumasaqaat, § 30, imm. 2-mi aamma 4-mi piviusumik tunngaveqarnissamik tamatigoortuunissamillu piumasaqaatinut nallersuunneqassaaq.

imm. 4-mut

Peqatigiiffilerineq kapitali manna naapertorlugu tapiiffigineqartartoq, naalakkersuinikkut ingerlatsinermut, upperisarsiornermut imaluunniit sulisartut peqatigiiffeqarnerannut tunngasunik imaqassanngilaq. Peqatigiiffiilli naalakkersuinermik ingerlatsinermik, upperisarsiornermik imaluunniit sulisartut peqatigiiffeqarnerannik siunertaqartut sulinerannut tapiissuteqartoqarsinnaavoq, suliarineqartut taamatut imaqanngippata. Taamatuttaaq ininik assigisaannillu attartortitsilluni naalakkersuinermik ingerlatsinermut, upperisarsiornermut imaluunniit sulisartut peqatigiiffeqarnerannut tunngatillugu siunertanut peqatigiiffilerinernut allanutulli piumasaqaatitalerlugit tapersiisoqarsinnaavoq.

§ 31-imut

Malittarisassat nalunaarutinngorlugit assigisaannilluunniit aalajangersarneqarsinnaapput.

§ 32-imut

imm. 1-imut

Init il.il. pisariaqartinneqartut akeqanngitsumik atugassanngortinneqarnissaannik piumasaqaateqarnermut pissutaavoq matumani pingaarnerusutigut sammisat kommunimit suliarineqartartut pineqarmata.

imm. 2-mut

Meeqqat inuusuttullu suliniaqatigiivinut init silamilu ingerlatsiviit pillugit Namminersornerullutik Oqartussat nalunaarutaat nr. 20, 27. september 1988-imeersoq takuuk.

§ 33-imut

imm. 1-imut

Meeqqat inuusuttullu suliniaqatigiivinut init silamilu ingerlatsiviit pillugit Namminersornerullutik Oqartussat nalunaarutaat nr. 20, 27. september 1988-imeersoq takuuk.

imm. 2-3-mut

Tapiissuteqartoqarnissaanik taamaattoqassappallu aningaasanik qanoq amerlatigisunik toqqarlugu isumaqatigiissuteqartoqarsimanissaanut taanna tunngavoq.

§ 34-imut

imm. 1-3-mut

Aaqqissuussineq Ineqarnermut, Attaveqarnermut Pilersuinermullu Pisortaqarfimmit allaffissornikkut aqunneqarpoq.

§ 35-imut.

Aaqqissuussineq Ineqarnermut, Attaveqarnermut Pilersuinermullu Pisortaqarfimmit allaffissornikkut aqunneqarpoq.

§ 36-imut

Aalajangersagaq taanna malillugu Naalakkersuisut paasissutissanik sunik kommunalbestyrelsimit pissarsiniarsinnaanerannut Naalakkersuisut tamanna pillugu aalajangiinerat apeqqutaassaaq.

§ 37-imut

imm. 1-imut

Aalajangersagaq manna meeqqat atuarfiat pillugu Inatsisartut peqqussutaat nr. 1, 6. juni 1997-imeersumi § 53, imm. 1-imut naapertuuppoq. Naalakkersuisut aamma kommunip ataatsip arlaqartulluunniit akornanni suliassanik nuussisoqarnissaanik isumaqatigiissuteqartoqartillugu suliassat suut nuunneqassanersut erseqqissaatigineqartassaaq.

imm. 2-mut

Maannakkutut kommuninut agguataarisoqarsimatillugu matumani Pituffik kisimi pineqarsinnaavoq.

§ 38-imut

Aalajangersagaq manna naapertorlugu eqqarsaatigineqarpoq ilaatigut aalajangersarneqassasoq, peqqussummi aalajangersakkat naapertorlugit tapiiffigineqarnissamut peqatigiiffimmut suut piumasaqaataasinnaanersut, assersuutigalugu malittarisassat, naatsorsuutit, siunertaq siulersuisullu eqqarsaatigalugit.

§ 39-imut

imm. 1-imut

Aalajangersakkakkut periarfissaqalerpoq misileraanissamik akuersissuteqarsinnaaneq, taamaanngippat taakku peqqussummut akerliussagaluarmata.

imm. 2-mut

Tapiissuteqartoqarnissaanik taamaattoqassappallu aningaasanik qanoq amerlatigisunik toqqarlugu isumaqatigiissuteqartoqarsimanissaanut taanna tunngavoq.

§ 40-mut

Peqqussutaasimasumut naleqqiullugu nutaartaavoq kommunalbestyrelsit ilaasa aalajangiineri pillugit Naalakkersuisunut naammagittaalliuuteqarnissamut nalinginnaasumik aqqutissaarummat. Allannguinermut tunngavigineqarpoq maannamut malittarisassaasut naapertorlugit nalinginnaasumik Inatsisartut Ombudsmandiannut naammagittaalliuuteqarnissamut aqqutissaqarmat, taassumalu misissortarpaa suliamik ingerlatsinermi malittarisassat nalinginnaasut malinneqarsimanersut.

§ 41-mut

Piffissaq atuutilerfissaa imatut aalajangersarneqarpoq, peqqussummi aalajangersakkat, kommunini sunngiffimmi sammisassaqartitsinermut ataatsimiititaliat atorunnaarsinneqarnissaat ilanngullugu, sapinngisamik piaarnerpaamik atuutilersinnaanngorlugit.

§ 42-mut

imm. 1-2-mut

Sunngiffimmi sammisaqartitsineq pillugu peqqussut aamma kulturimut atuartitsinermullu tunngasut siulersorneqarnerat pillugu peqqussut, taassumalu ilaa meeqqat atuarfiannut tunngasoq 1. august 1997-imi atorunnaarsinneqartoq, peqqussutip massuma taarserpai. Taamaattorli sunngiffimmi sammisassaqartitsinermik ingerlataqarneq pillugu peqqussummi meeqqat atuarfianni ilinniartitsissutinik ataasiakkaanik ilinniartitsineq pillugu aalajangersakkat atorunnaarsinneqarnissartik tikillugu atuutiinnassapput, imaluunniit maanna meeqqat atuarfiat pillugu iluarsartuusseqqinnermut atasumik aalajangersakkanik nutaanik taarserneqarnissartik tikillugu.

imm. 3-mut

Sunngiffimmi sammisassaqartitsinermut ataatsimiititaliat maannamut atuuttut siunnersuut naapertorlugu 2002-mi juuli tikillugu ingerlasussaammata, taamaalippat atorunnaarsinneqassallutik, tamatuma peqatigisaanik sunngiffimmi sammisassaqartitsinermut ataatsimiititalianik qinersisarneq pillugu nalunaarut atorunnaarsinneqassaaq.